Marwa 27 ans, maman d’un prince de 14 mois.

عالسلامة امهات انا اسمي مروة و عمري 27 سنة و عندي وليد عمرو عام و شهرين . رحلتي مع الرضاعة بدات قبل ما نجيب ولدي . عندي مجلة صغيرة وانا حبلة شريتها مالفريب على الحبالة و ما يخصها ، فيها جزء باهي على الرضاعة الطبيعية من وقتها بديت نلوج على اكثر معلومات على الفايسبوك لقيت مجموعة الرضاعة الطبيعية الناجحة . الحاصل النهار الكل و انا في القروب 😅 و زدت عملت حصص تحضير للولادة و الحمد لله كنت نحضر في روحي نفسانيا للولادة و الرضاعة نستنى بفارغ الصبر لحضاتي الاولى مع ولدي و الساعة الذهبية و اول رضعة ، ياخي يعملو هكا و يبدلولي وجهتي و نولد بالعملية على غفلة وضاعت الساعة الذهبية و اول رضعة و عطاوه بيبرون. اول ما خرجت مالبيت متع العمليات طلبت يجيبولي ولدي نرضعو و رضعتو و بات بحذايا و من وقتها و هو يرضع كان من عندي الحمد لله. جات مراتٍ زعما رخيت و سلمت وانا قاعدة نعيش في اقوى وجيعة عشتها في حياتي ، وجايع بعد العملية، الحمد لله الي في لحضات الضعف ربي يعطي القوة لشريك حياتك بش يقويك و يشجعك . الحمد لله لقيت راجلي الي شجعني و قواني بش ما نسلمش و نكمل نرضع، لقيت امي و حماتي و بابا و العايلة الكل تدعم وتشجع وتعاون ، بالحق العيلة سند و رحمة من عند ربي…

ساعات نحسو كلمة معجزة كلمة عظيمة لازم تدل على حاجة خارقة ولكن كلمة معجزة كلمة تعبر تماما على رحلة الامومة مل الحبالة للولادة للرضاعة  ملي قلب الصغير يدق حتى لين يكبر و يتفطم و نراوه يكبر قدامنا … معجزة. سبحان الخالق

محلاها الرضاعة الطبيعية رغم تعبها و قلة النوم وسنوني الاربعة الي طاحو هههه محلاها.

محلاها خاصة كيف تلقى شكون يشجعك و يعاونك و يعطيك طاقة ايجابية في وسط غمرة التعب و البكاء والاجهاد. محلاها كي تحس روحك مكش وحدك و تلقى شكون يقويلك عزيمتك ، نحمد ربي الي عرفت آية بالخير الي ربي جعلها سبب باش نقرر انا وراجلي من قبل ما نجيب ولدي اني ما نرضعو كان من عندي .كلمة شكر في حقك آية انت بالحق اسم على مسمى وانت آية في الصدق والاخلاق و التواضع والصبر و وسع البال. ربي يباركلك نلقاك كي نحير و ندخل بعضي كيف الاخت و السند. ربي يباركلك و يبارك في مجهوداتك و يبارك في مجهود كل انسان يخدم على التوعية بأهمية الرضاعة الطبيعية. انتوما قاعدين تبدلو في حياة الناس للأفضل! 

رحلتي مع الرضاعة الطبيعية باذن الله متواصلة مانيش ناوية نفطم ولدي حتى كان فات العامين ان شاء الله حتى فوق الثلاثة سنين ان شاء الله ربي يعطيني الصحة والقدرة نرضعو حتى لين هو يقلق 😅